දෙයියන්ගේ ලෙඩ (සිව් වැනි දිග හැරුම)

දෙයියන්ගේ ලෙඩ පළමු, ‍දෙවැනි සහ තෙවැනි දිග හැරුම කියවන්න බැරි වුණ අය යන්න ඕනේ මෙන්න මේ මංපෙත් දිගේ  . . .

ඉමාලිගේ ඒ වදන් පෙළ අනුරාධගේ නින්ද ආයෙමත් නොඑන්න ම ඈතට තල්ලු කරලා දැම්මා. ඔහුගේ හිතේ සැනසීම දිය පිට ඇඳි ඉරික් වගේ නැති වෙලා යන්න ගත වුණේ ක්ෂණය යි. නයෝමි හැර ගියාට පස්සේ ඔහු ඇගෙන් දුරකථන ඇමතුමක් ලැබෙන තුරු වසර ගණනාවක් පෙරුම් පිරුවා. රෑ නිදි මරාගෙන දුරකථන තිරය දිහා බලාගෙන හිටියා. දුරකථනය නාද වෙන හැම වෙලාවක ම ඒ දිහා බැලුවේ බලාපොරොත්තු පිරිච්ච හිතකින්. ඒත් කවදාවත් ඇය කතා කළේ නැහැ. අන්තිමේ දී ඔහුට අවශ්‍ය නැති වෙලාවක, ඔහුගේ හිතේ සැනසීම නැති කරමින් ඒ දුරකථන ඇමතුම ඇවිත් තිබුණා.

සිහින් හඬින් කරණීය මෙත්ත සූත්‍රය සජ්ඣායනා කරන ඉමාලි‍ගේ සිහින් ඇඟිලි තුඩු කෙස් කළඹ අතරින් දිව යන අයුරු ඔහුට දැනුණා. දිගු වේලාවකට පස්සේ ඔහු ව පොරෝනයෙන් හොඳින් ආවරණය කරලා ඔහුගේ නළලට හාදුවක් දීල මුළුතැන්ගෙය දෙසට ඇවිදගෙන යන ඇගේ පියවර හඬ, දොර ජනෙල් වහන ගමන් ඇය ගැයූ ගීයේ මියුරු හඬ, සිහින් පොද වැස්‍සක් වගේ නාන කාමරයේ වතුර වැටෙන හඬ ඔහුට ඇසුණා. ඒ හැම දෙයක් ම සිදු වුණේ හුඟක් හෙමින්. අන්තිමේ දී ඔහුගේ හදවතේ රිද්මයට සවන් දෙමින් ඇය නින්දට වැටුණා.

නමුත් නින්ද ඔහු ‍ළඟට ආවේ නැහැ. ඒ වෙනුවට එකිනෙකට වෙනස් සිතුවිලි දහසක් ඔහුගේ හිත ඇතුළේ පෙරළි කළේ පැටලුණ නූල් බෝලයක් වගේ. නයෝමිගේ දුරකථන ඇමතුමට හේතුව දැන ගන්න ඔහුගේ සිත නොඉවසිල්ලෙන්. ඒ නිසා නිරායාසයෙන් ම ඔහුගේ සුරත මේසය මත තිබුණ ජංගම දුරකථනය දෙසට ඇදුණා.

වසර ගණනක් තිස්සේ ඇය වෙනුවෙන් ඔහුගේ දුරකථන අංකය නොවෙනස් ව තිබුණත් ඇගේ දුරකථන අංකය වෙනස්. 'ඇයට දුරකථන ඇමතුමක් ගන්නවා ද?' ඔහුගේ සිත වල්මත්. නයෝමි පිළිබඳ මතකයන් යටපත් කරමින් ඔහුගේ පපුවේ උණුසුමට තුරුල් වෙලා නිදන ඉමාලිගේ රුව දෙසට ඔහුගේ දෙනෙත් යොමු වුණේ අහම්බෙන් වගේ. 'රෑ‍ නිදා ගන්නකොට ඔයාගේ හදවත ගැහෙන සද්දේ ඇහෙද්දී ම‍ට ලොකු ආරක්ෂාවක් දැනෙනවා, අනුරාධ.' ඇගේ කටහඬ ඔහුගේ දෙසවන් අසල රැව් දුන්නේ ඔහුගේ සිත තුළ නැණ පහන් දල්වමින්.

නයෝමිගේ ඇමතුමට අදාළ සියලු මතකයන් දුරකථනයෙන් මකා දමන්න අනුරාධට ගත වුණේ එක ම එක මොහොත යි. ඔහුගේ සිතට දැනුණේ සැහැල්ලුවක්. දැරිය‍ නොහැකි වේදනාවක් සිතෙන් ඉවත් ගිය පසු ඇති වන අසාමාන්‍ය සැනසිල්ලක වෙළී ඔහු නින්දට වැටුණා.

✾     ✾     ✾

රැය පුරා ඇද හැලුණ මහ වැසි අලුත් හිරු උදාවත් සමග පහ ව ගියේ අඳුරු වලා පටලය රන්වන් ළහිරු කිරණින් සිත්තම් කරමින්. විවෘත වුණ කවුළුව තුළින් හමාගෙන ආවේ සීතල සුළඟක්. ජනෙල් පඩිය මත තිබුණ උඩවැඩියා පඳුර සුදෝසුදු මලින් බර වෙලා. ඒ අසල ම ඉමාලිගේ හුරතල් ලේන් පැටියා උදේ කෑම වෙලාව එළඹෙන තුරු නිදහසේ දඟ කරමින් හිටියා. ඇ‍ඳෙන් බැහැලා නාන කාමරයට ගිය අනුරාධ මුහුණ සෝද ගත්තේ ප්‍රබෝධයෙන්.

ඒ හැම දෙයක් ම අනුරාධගේ හිතට අරගෙන ආවේ අලුත් ආරම්භයක්. හැම වේදනාවක් ම අමතක කරලා නයෝමි නැති ලෝකයක් තනන්න ඔහුට අවැසි වුණා. ඉමාලිට විතරක් ආදරේ කරන්න. හැමදාම ඇය ව සතුටින් තබන්න. ඒ වෙනුවෙන් නයෝමි ව සදහට ම ඔහුගේ ලෝකයෙන් ඈත් කළ යුතු බව ඔහු දැනගෙන හිටියා. ටිකක් කල් ගත වුණත් අන්තිමේ දී ඒ තීරණය ගැනීම ගැන ඔහු හිටියේ තෘප්තියෙන්.

"මොකද අනේ තනියම හිනා වෙන්නෙ?" ඉමාලි ඇහුවේ ඔහුගේ අතට තේ කෝප්පයක් දෙන ගමන්. ඇය හිටියේ තැඹිලි පැහැ ඔසරියකින් හැඩ වෙලා.

"ඒක රහසක්. අම්මේ, මෙයාගේ හැඩ! මොකෝ මේ උදේ පාන්දරින් ම ලෑස්ති වෙලා?"

"අද උදෙන් ම යන්න ඕනේ, අනූ. මම ඊයේ පොරොන්දු වෙලා ආවේ."

"මොනවා ද ඔච්චර වැඩ?"

"ඒක රහසක්," ඉමාලි සරදම් කළා. "කියන්නේ නෑ ඔයාට."

"අපෝ, වැඩේමයි මට ඔයාගේ රහස් දැන ගන්න. අනික මම සෑහෙන්න වැඩ තියෙන මනුස්සයෙක්. ඔයාට වගේ හෝඩියේ පන්තියේ වැඩ කරන්න වෙලා නෑ මට. තේරුනා ද මැඩම්?"

"එහෙම ද? කිව්ව එක හොඳයි මට දැන ගන්න. මම යනවා," ඉමාලි කිව්වේ බොරු අමනාපයකින්.

"මගේ කෑම එක ලෑස්ති කරලා යන තැනක ගියාට කමක් නෑ."

"ඔයා මහ නපුරෙක්."

"නපුරෙක් වුණත් ඔයාගේ මහත්තයානේ. ඒ නිසා ඔයා මම කියන විදියට වැඩ කරන්න ඕනේ," අනුරාධ කිව්වේ ඉමාලිට යන්න බැරි වෙන්න ඔසරි පොටින් අල්ලා ගන්න ගමන්.

"මට යන්න දෙන්නකෝ."

"විහිළුවක් කරේ. පරිස්සමින් ගිහින් එන්න."

"මම දන්නවා. ඔයාගේ දවල් බත් එක කෑම මේසේ උඩ ඇති. මතක් කරලා ඒක අරගෙන යන්න. උදේට කාල මිසක් ඔෆිස් යන්න බෑ ඔන්න."

"හරි," අනුරාධ කිව්වේ ඉමාලිගේ ආදරේ විඳින ගමන්. නයෝමිගේ ආදරේට වඩා හාත්පසින් ම වෙනස් සරල බවට මුවා වුණ ගැඹුරු ආදරයක්. ඔහුගේ සිත‍ වෙළා ගත් සියලු ‍දුක් දොම්නස් පලවා හරින ආද‍රයක්.

"මම යන්නං, අනුරාධ. ඔයත් පරිස්සමින් ගිහින් එන්න. මම ඔයාට හුඟක් ආදරෙයි."

"මමත් ඔයාට හුඟක් ආදරෙයි," අනුරාධගේ කිව්වේ ඉමාලි ව තදින් පපුවට තුරුල් කරගෙන ඇගේ හිස සිප ගනිමින්. "හුඟක් ආදරෙයි හැමදාම."

"මම දන්නවා. මමත් එහෙම යි."

දිගු වේලාවකට පස්සේ අනුරාධගේ ග්‍රහණයෙන් මිදිලා ඇය දොරටුව දිහාට පිය නැගුවේ හිත වසා ගත්ත සැනසිලිදායක හැඟුම් වලාවක් සමග. පෙර දා රැයේ හිතේ ඇති වුණ සැකය ගැන ඇය පසුතැවිලි වුණා.

ඉමාලි නිවසෙන් පිට වුණාට පස්සේ අනුරාධගේ හිතට දැනුණේ පාළුවක්. වසරකට ආසන්න යුග දිවියේ සොඳුරු මතකයන් ආවර්ජනය කරමින් ඔහු‍ කාර්යාලයට යන්න සූදානම් වුණත් ඒ තනිකම මැකිලා ගියේ නැහැ. ඇගේ මියුරු සිනා හඬ නෑසෙන නිවස, සොහොන් බිමක් සේ නිහඬ යි. බොහෝ වෙලාවකට පස්සේ ඒ නිහඬ බව බිඳිලා ගියේ නොනැවතීම නාද වුණ ඔහුගේ ජංගම දුරකථනයේ හඬින්.

"අනුරාධ," නයෝමිගේ හැඟුම්බර කටහඬ දුරකථනය තුළින් ගලාගෙන ආවා. "ඔයා තාමත් ඒ කාලේ යූස් කරපු නම්බර් එක නේද යූස් කරන්නෙ?"

"ඔව්. කියන්න දෙයක් තියෙනවා නං ඉක්මනට කියන්න, නයෝමි. මට ඔෆිස් යන්න පරක්කු වෙනවා."

"ඔහොම නපුරු විදියට කතා කරන්න එපා, අනූ."

"මේ නයෝමි, මට ඔයා එක්ක නිවී සැනසිල්ලේ කතා කර කර ඉන්න වෙලා නෑ. ඔයාට කියන්න දෙයක් තියෙනවා නං ඉක්මනට කියලා ඉවර කරන්න."

"ඔයාට මොකද වෙලා තියෙන්නෙ, අනූ?"

"මට මුකුත් වෙලා නැහැ, නයෝමි. මට ඇත්තට ම ඔයා එක්ක කතා කරන්න දෙයක් නැහැ. ඔයා ඒක තේරුම් ගන්න. කියන්න ඕනේ හැම දෙයක් ම මම ඊයේ ඔයාට කිව්වනේ."

"ඒත්, අනුරාධ . . ."

"නයෝමි, මේ අහන්න. දැන් ඉස්සර වගේ නෙමෙයි. හැම දෙයක් ම වෙනස් වෙලා. මම බැඳපු මිනිහෙක්. මට ම කියලා ජීවිතයක් තියෙනවා. අනික ඔයත් බැඳපු කෙනෙක්. ඒ නිසා අපිට ඉස්සර වගේ කතාබහ කරන්න බෑ. එහෙම කරන එක හොඳ මදි."

"මම ඩිවෝස් වුණා."

"ඒක හරි. ඒත් ඔයා ඩිවෝස් වෙච්ච එක මට අදාළ නැහැ. අනික මම ඩිවෝස් වෙලා නැහැනේ, නයෝමි. මම ඉමාලිත් එක්ක සතුටින් ඉන්නවා. හුඟක් සතුටින්. මම ඇත්තට ම කැමති නෑ ඔයා මට කතා කරනවට. මොකද ඔයා නිසා ඉමාලිගේ හිතට දුකක් දෙන්න මට ඕනේ නැහැ. ඒ නිසා කරුණාකරලා ආයෙත් මට කතා කරන්න එපා."

"අනුරාධ, මට කතා . . ." ඔහු ඇමතුම විසන්ධි කළා.

ඉන් පසු ව පැමිණි දින කිහිපය ඔහු කැප කළේ ඉමාලි වෙනුවෙන්. ඇගේ කටයුතුවලට සහය වෙමින්, සරසවි සිසුන් සමග එක් ව ඇයට විහිළු තහළු කරමින්, නිරන්තරයෙන් ම ඇය අසල දැවටෙමින් ඔහු ගත කළේ පුළුන් රොදක් සේ සැහැල්ලු දිවියක්.

ඔහු කාර්යාලයේ දී පවා කටයුතු කළේ දැඩි උද්‍යෝගයකින්. ගෙවී ගිය දින කිහිපය ඇතුළත ඔහුගේ සිතේ අලුත් බලාපොරොත්තු ඇති කරන්න ඉමාලිට හැකි වී තිබුණා.

"සර්," නයෝමිගේ අවසන් දුරකථන ඇමතුමෙන් සතියක් ඉක්ම ගිය දා ගොඩනැගිලි සැලැස්මක් අධ්‍යයනය කරමින් අවිවේකී ව හිටපු අනුරාධට බාධා කරමින් කාර්යාල සහයකයෙක් ඔහු ව ඇමතුවේ යටහත් පහත් විදියට.

"ඇයි, ඉසුරු?"

"සර් ව මුණ ගැහෙන්න මිස් කෙනෙක් ඇවිල්ලා," ඔහුගේ පිළිතුර අනුරාධගේ දෑසේ මතු කළේ පීඩාකාරී බැල්මක්.

෴  මතු සම්බන්ධ යි ෴